Taksa,Thinlung le Thlarau ah Na Dam Taktak Maw?

02/05/2010 00:08

Na Dam Maw?

2 Siangpahrang. 4: 26; Jeremiah.8: 22 Matthai. 9:12.

 

By Robert Thawng Zam

Germany

Date: April 10, 2010

 

Biahmaidawmhnak

Kan Baibal kan zoh tik ah Damnak  le Damlonak kong hi vui tampi kan hmuh khawh. Ahleicein Zisuh cawnpiaknak le ministry tuanak chungah kan hmuhkhun. Minung cu kan tthih lo i kan nun ko ahcun kan caah a herhbikmi cu Damnak asiloah dam/ngandam a si ko. Zeituk rum in mei ngei le mifim, catang sang le thiltthei si hmanh u sih  law, kan ngan a dam lo ahcun nun hi sullam a ngei dih kho hlei lo. Dam a duh lomi le Zawt cu a nuam bak ko timi hi kan um lai ti ka zum lem lo.

Taksa le Thinglung a dam lomi nih Taksa le Thinglung damnak kan herh i, Thlarau a dam lomi nih Thlarau damnak kan herh ve. Taksa damlonak ahhin zawtnak phun tampi le kan zawtnak a ruang phun tampi an um. Cuvebantuk  in Thlarau lei kan damlonak zong  ah hin zawtnak phun tampi le kan zawtnak a ruang phun tampi a um ve. 

A pawi bikmi cu ka dam ma, damlo timi mah le mah i thei/hngal lo hi a si. Dam le damlo aa theilomi cu an ruah lo piin kan dam ko rua an ti lio ah an thi theu ton. Cucaah kan damlonak kan  i theih/hngalh hi a biapi tukmi a si. Thlarau lei zong ah na damlonak le na zawtnak  hi naa thei ve lo ahcun na ruah bantuk a si  te lai lo, Vanram hna Krihfa ka si caah ka kai ko lai tiah na ruah men lai, asinain Ni donghnak caan a phak tik  le na taksa pum a thih tik ah  Hellram ah na tla te ko lai. Na taksa pum dam lio le na nunchung ahcun na ngaichih lai lo nain, na thih hnu, Hellram na phak tik ah na ngaichih te lai unau.

Cu caah atu ah na dam le damlo i chek caan le i ruahtthan caan Bawipa nih an pek ve. A caan na ngeih lio ah daithlang lai cih. Dam na duh ahcun damnak Sibawi panh ve law, Taksa, Thinlung le Thlarau he an damter kho tu Thiang Thlarau kha na nunnak ah sawm ve,….. hawidawt.

Bible relnak: 2Siangpahrang. 4:26b “Na dam maw? Na va a dam maw? Na fa a dam maw?’’ Jeremiah. 8:22 “ Gilead ah damnak si-ai a um ti lo maw? Khika ah Sibawi pakhat tal an um ti lo maw? Zeicahdah ka mi hna hi an dam hnga lo? Matthai. 9:12b “ A dammi nih cun Sibawi an herh lo, a zawmi lawng nih Sibawi an herh”.

Ahleicein in 2Siangpahrang angan 4 le 5 nak chung bia hi a tambik in kan i ruah hna lai i fainter kan i zuam hna lai.

I. Dam ti sullam cu zeidah a si?

Dam ti sullam cu orginal sinak ning tein sipeng, umpeng; kan si-awk a simi sinak ning tein si, kan dirhmun a si awk dirhmun te ah dir le um. Khat talei in kan chim a si ahcun Pathian a kan sertu nih hitin si hna seh ti a kan duhning le a kan ser hnawhchan ning tein si, nun, um le kal, thangtthat le biak ti-nak a si fon.

DAM ti sullam hman kan theihfian ding ah: Damlonak asiloah Zawtnak a sullam kan theih ta a hau. Tahchunnak ah;Kan pumchung ah kut, ke, lu, mit, pum, tiin a phunphun in sinak tampi an um hna. Cu pawl cu anmah le sining original ning tein um ti loin sining dang ah an i thlen sual tik le anmah le umnak ding a simi hmun zawn te-ah an um lo tik ah kan Taksa pumpi cu fahnak le buainak le nuamhlonak le chiatnak phunphun in a khat cucu Damlo, asiloah Zawt ti cu a si ko.   Adam le Evi cu Pathian nih a serka hna le an minung Original sinak ah a dammi le sualnak a ngei lomi, zawtnak a ngeilomi, Pathian duhnak ning in a  nungmi, an si awk ding a simi ning tein a simi, a ummi, kar hlangmi, a thlaraumi an si hna.

Asinain an ngaih lo awk le a zumh lo awk a simi Satan pa bia kha an zumh i an ngaih tik ah an nih cu a damlomi, zawtnak a ngeimi, sualnak a ngeimi, taksami ah an cang. Aruang cu an si awk a simi sinak ning in an si ti lo, an um ti lo, an kal ti lo, an zum ti lo caah a si. Atu cu an original sinak kha an hrawh cang. Pathian fa sinak in Satan pa fa ah an i cang cang. (Jh. 8:44). Cu cu damlo  asiloah Zawt ti cu a si.

Cu Adam bantuk sualnak a tuah lomi zong Adam sualnak ruangah sual an sidih a ti; khat talei in kan chim ahcun a kan hringsortu kan pabik Adam damlo ruangah, Zawtnak kan ing dih, damlonak kan ngei dih hna. (Rom. 5:12-19; 1Korin. 15:21-22).

Unau nang tah nihin ah Na Dam taktak Maw? Na chungkhar an dam taktak maw? Na Krihfa Buu an dam taktak maw? Na si awk a simi sinak ning tein na si taktak maw? Na um taktak maw? Na chim awk a simi ning tein na chim taktak maw? An Sertu Pathian nih hitin siseh ti an duhning in na si taktak maw? Hitin ka bia in ka tthangtthat seh ti Pathian nih an duhpiak ning tein na bia i na tthangtthat taktak maw?

Sertu Pathian nih siseh ti an duhmi cu: (A dammi Nun):

      1).Ti le Thlarau in hrintthar/hrintthan seh ti an duh. Khrih i afa sinak kan i thawknak hrampi cu Ti le Thlarau in hrintthan hi a si. Nangmah duhning si loin an Sertu duhning in si, kal, tuah le um  kha dam ti cu a si.

Zeiruang dah hrinthan cu kan herh/hau?

a). Pathian a kan sertu nih si hna seh ti a duhmi a si caah. Johan.3:3,5 “ Jesus nih biatak tein kan chimh, Mi zeihmanh asiah Ti le Thlarau  in  hrinthan a si lo ahcun Pathian pennak chungah a lut kho lai lo a ti.  Na hrinthan rih lo ahcun na dam rih lo tinak a si ko.

b). Mi vialte cu damlonak phuntling he a khat dihmi sinak in kan nu Pawchung in hrin kan si caah.( Salm 51:5; 53:3, Job. 15:14-15; Isaiah. 1:5-6; Jere. 9: 5,8) Cu caah a dammi nun na ngeih rih lo ahcun damnak bawi vun panh ve. Jesus nih bialih a chim lo, biatak tu a chim deuh.

       2)Thiang Thlarau in khat sehlaw, na thlarau mit khua hmuh seh ti an duh. (Lam. 9:17; 19:2, 6, 2:4, etc).

      3)Zu ding ti lo, Kuak zu ti lo, Khaini hmom ti lo, mikong tamtuk ceih ti lo, vawlei pumsaduhnak kha tleihchan ti loin um seh law, Thiang Thlarau tuin khat seh ti an duhpiak. (Effe. 5:18, Isaiah. 5: 11; Phungthlukbia.23:20; 1John. 2:15; 2 Korin.6:17;Rom. 12:2; 2Piter. 2:19-22; 1Kor. 5:9-10, 6:18).

       4).Thiang Thlarau le a riantuannak kha a doh in doh le soisel zahpi siloin a tanh tuin tanh seh law, i nunpi seh ti an duh. (2Korin. 13:8; Matthai.12:31-32;Mk. 3:29; Lk.12:10).

       5).Thlarau le Biaktak in ka bia seh law, ka thangtthat seh ti an duh.(John. 4:24;Colose 3:16 Effese. 5:9).Hika Effese le Kolose zawn hi Mirang le German le Greek Bible ahcun thlarau hla ti a si, Lai Bible ahcun thlarau hla ti biafang hi a thlau tak. Kan Lai Bible nih Thlarau Biafang le biafang dangdang a tthatukmi a thlau sualmi a tamtuk i, hihi kan Hakha Lai Bible a hmangmi kan ca ahcun ngeihchia ngai le vanchiat taktak a si.

       6).Amah ka ngal seh law, zeizong vialte (vawlei tthil le pumsaduhnak) nak in ka daw deuh seh ti an duh (Hosea 6:6; Biathlam. 2:4; Deut.6:5; John. 21:15-18; 1Joh. 4:19:20 etc.).

         7).Khamhnak co seh law, zungzalnunak ngei seh ti an duh.(1Timo.2:3-4; 2Piter. 3:9, etc.)

         8).Taksa, Thinlung le Thlarau dihlak in dam seh ti an duh. Cu caah na caah Fapa ngeihchun te an pek i cu fapa Jesus Krih na zum ahcun zungzalnunnak atu caan bak ah na co, na hmu lai. Manpek a hau lo. (John. 3: 16; Lamkaltu. 2:21; Rom. 10:9-10-Nan ka in Jesus cu Bawipa a si tiah nan chim i, nan lungthin amah cu Pathian nih thihnak in athawhter tthan tiah nan zumh ahcun khamh nan si lai a ti).

        9).Na pum kha Pathian Thlarau Biakinn thiang a si kha hngal, thei seh law, thianghlim tein nung seh ti an duh. ( 1Korin. 6:19-20, 3:16-17).

        10).Thlarau thei tampi tei seh ti an duh. ( John. 15:15; Galati. 5:22-23).

        11).Minung hoi le na fimnak, na thiamnak i bochan lo le i rinh loin a nungmi Pathian Thiang Thlarau tu i bochan seh law, a rinh seh ti an duh. (Jer. 17: 5,7; John. 14:1; Phungthlukbia. 11:28, 28:26; Zekhariah. 4:6).

       12).Mission rian tuan seh law, Vawlei mi vialte kha a zultu ah ser hna seh an duh. (Matt.28:19-20, Mk. 16:15; Lk. 24:47; Isaiah. 60:12; Ezekiel. 22:30). A dammi zumtu, a dammi Krihfa Buu nih cun Mission rian an tuan ton. Mission rian a tuan rih lomi Krihfa Buu nan si ahcun nan dam taktak rih lo tinak a si. Dam nan herh ko lo maw, hoidawt?

       13).Thla tamdeuh cam seh law, Baibal tam deuh rel seh ti an duh. (1Thesalon. 5:17; Lk.22:40; Kolose.4:2; Joshua. 1:8;Deut. 6:6-8). Billy Graham, vawleicung phunchim minthang, Pathian mi nih cun, “ thlacam lo ni, thlachuah hmuh lo ni a si “a ti. Martin Luther, thlarau lei pa nihcun, “ Zing ka thawh le cangka in suimilam 2 chung tal thlacam loin ka umsual ahcun chun nitlak(nikhat chung) Satan pa caan ttha ka pek khi a si ko” a ti ve. Thlacam cu kan teinak a si.

Sertu Pathian nih hitin si seh law, hi tin nung seh, ti a kan duhpiak ning tein nun, si kha a hmanmi damnak cu a si.

II. Shunam Mirum Nu Nunak nih a Kan Cawnpiakmi

1). Profet Elisha cu Pathian rian a tuan i khualton a kal caan chel paoh ah Shunam mirum nu te Inn kha a pal pah ton i an Inn ah Ti a ding i, rawl a hrawn pah ton hna. Nikhat cu Shunam minu nih Profet  Elisha cu a tidin dan, a rawl ei dan, a hoiher, a umtu a zoh tik ah fiang tein a theihmi le a hmuhmi cu, “ hi pa hi a rawl ei, a ti din le a umtu, a biachim ka zoh i Pathian mifa a si ka theih ati”. Phundang chim ahcun a dammi Zumtu a si kha ka theih ti nak a si ko. Zeiruangdah Pathian mifa a si ti a theih khawh ti ahcun Profet Elisha cu a dammi nun a ngeih caah a si.

Cu nih a kan cawnpiakmi cu kan kaa in Krihfa ka si, mi pianthar ka si, zumtu ka si ti kan chim lennak chal cun kan nuncan ziaza tu ah khan Pathian fa kan sinak kha mi nih a kan hmuh ve ding a si. Cucu a dammi nun cu a si.

2). Shunam mirum nu nih cun Elisha cu Pathian mi a si ti a theih le cangka in Elisha a umnak ding caah hmunhma a serpiak ning law a ttha lai tiah a ruah, cu ruahnak cu tthilttha a si aipat tiah amah duh paoh in a tuah lo, a vapa kha a chimh( a suai nuai, a ttan pin) hmai sa. A vapa zong nih a nupi ruahnak kha Pathian mi caah a si ti a theih le cangka Elisha caah hmunhma a pek colh ve. Cu tin nu le va lungkhat, thinkhat tein dawtnak he khua an khan ttimi nihcun Pathian lung tongtuk ai.

Cu nih a kan cawnpiakmi  cu kan nih zong kan pumchungah sinak tampi a um bantuk in kan kut le kan ke, kan mit le kan hnar, kan ka le kan pum, kan lungthin le zumhnak hna hi lungkhat tein khua an saktti awk a si i, an kaltti awk si ve. Na pawpi, na cuamp le na thlarau caah a tthalomi Zu, Kuak, Khaini, Kunya, Tikor, mi kong ceih lengmangnak te hna kha amah duh paoh in na ke nih kal hnawh, na kut nih lak riangmang in ka ka nih a din awk a si lo. Na thlarau caah a tthalomi kha na taksa nih a tuah awk a si ve lo.

Cu ve bantuk thiamthiam cun nu le va, u le nau, pa le fa, nu le fa, Krihfa buu ah pakhat le pakhat cun Krihbuu khat le buu khat, Innpa chakthlang daw le rem tein kan um awk a sinak kha a si. Thilttha a si aipat, ka ruahnak a si aipat tiah va zong theihter lo, nupi zong theihter lo, u le nau zong theihter lo, Krihfa buu zong theihter loin rian kan tuan awk le thil kan tuah awk a si lo. Dawtnak he pakhat le pakhat kan i suai nuai ding le kan i theihter ding a si. (Matthai. 18:19) Pahnih, pathum lungkhat tein nan umnak ah kei zong ka um lai i nan thlacamnak kha ka Pa nih an leh hna lai ( Pathian nih thlachuah an pek hna lai) a ti.

3). Cutin Shunam mirum nu le a vapa lungkhat tein an um, khua an khang tti i, Pathia mi caah hmunhma an pek bak in Pathian mi nih cun zeidah ka tuahpiak seh tin na duh tiah  a vun halcolh hna. (Hallelujah).

Cuvebantuk in kan lungthin le kan zumhnak, ka kut le ke, etc, nu le va, u le nau, Krihbu pakhat le pakhat rualrem te le lungkhat tein kan um bak ah khin Pathian nih a thlachuahnak pek a kan duh ve i, zeidah ka tuahpiak seh ti nan ka duh tihi a kan hal ve.

4). Shunam minu  nihcun a thawh i zeizong vialte ka ngeih dih. Inn ka ngei, Lo ka ngei, thilri ka ngei, phaisa ka ngei, ka herhmi zeihmanh a um lo, bomh ka ha lo a ti.  Shunam mirum nu cu a zawtnak le a damlonak, a chungkhar damlonak le zawtnak, chambaunak le herhmi a thei ai ti lo.  Acunglei ah ka langhter bantuk in mah tein ka zaw maw, ka dam dah ti theih lo hi  a poitukmi a si.

Sihmanhsehlaw, Pathian mi Elisha nih, herhmi pakhat te a ngeih, a dam lonak, le a zawtnak te a um ko ti kha fiang tein  a hngalhpiak i a theihpiak. Cu caah Elisha nih cun a thawh i hmaikum atu tik camtuak ah hin fapa te na ngei lai a ti. (Halleluja). Sunam minu cu amah tein a dam lonak le a herhmi aa hngal lo i aa thei lo, nain Pathian mi nih cun a dam lonak kum saupi a si cang i, a herhmi cu fapa ngeih a si ti kha fiang tein a theih, cutin a theih lawng si loin a tak in a damter i, fapa cu a pek ko. Amen.

Cunih a kan cawnpiakmi cu: Ka u le ka nau hna, nihin nangtah na dam lonak te, na zawtnak te naa theifiang ve cang maw? Europe ram ka um cang, ramthumnak ah ka um cang herhmi ka ngei ti lo, Inn ka ngei ko, rianttha ka ngei ko, Motor ka ngei ko, phaisa ka ngei ko, fimnak degree tampi ka ngei ko, ka rum ko tiah na dam lonak te theih loin Pathian sin thlacam hna na dai thlang ve sual maw? Chambaumi ka ngei lo, bomh ka hau lo, Pathian ka herh lo tiah na lung a puam sual maw?

Na thlarau damnak caah cu thil na ngeihmi vialte hna nihcun an dawn sual maw? Nihin ah Na dam ve lo ahcun damnak Bawi, Jesus sawm ve cang . Thiang Thlarau bomh hal ve cang hna u sih.  Pathian nih dam seh law, Thaing Thlarau in khah seh ti an duh ve dakaw. Na damlonak le na zawtnak  a um ahcun atu caan hrimhrim ah Thiang Thlarau sawm ve cang. Nangmah damter ding ah ready a si ko. Amah fuhpanmi zeitikhmanhah Jesus nih a lak in a kirter bal hna lo. (Exodus. 15:26) Keimah cu an damtertu hna Pathian, Bawipa cu ka si a ti. Amen.

5). Cu caah Pathian cu a biakam a let lo bantuk in a hmai kum, cu tik camtuak ahcun Shunam minu cu fa te a ngei taktak. (Halelluja).

Hmuhsakmi cu: Pathian cu a biakam a let lotu a sinak a si. Nan dam lai a ti ahcun dam bak a si, nan zaw lai a ti ahcun zawtbak, nan nung lai a ti ahcun nun bak, nan thi lai a ti ahcun thih bak, thlachuah nan hmuh lai a ti ahcun hmuh bak, nan sifak lai a ti ahcun fak bak a si ko. Acunglei ah Pathian nih siseh ti an duhmi kong asiloah a dammi nu/ dam phun 13 kan langhter cang kha. Kha ahkhan na dam le  dam vun i check tthan ta ve, hawidawt.

6). Cun ruah lo piin cu fapa te cu a zaw i,  a thi ai. A fapa te a dam lo, a thi ti a theih le  cangka in Shunam mirum nu cu, cuhlan bantuk in herhmi le chambaumi ka ngei lo, bomh ka hau lo ti si ti loin Profet Elisha, Pathian mi sin ah damnak hmuh duh ah le nunnak hmuh tthan duh ah khulrang tein a va tli. Khat lei chim ahcun atu cu a dam lonak, a fa dam lonak , a chungkhar damlonak kha a thei cang.

Cu nih cawnpiakmi: Cu vebantukin nihin ah taksa, thinlung le thlarau ah na dam ve lo i, na fapa le na fanu an dam ve lo i, na va le na nupi an dam ve lo i,  na chungkhar an dam ve lo i, na Krihfa Buu le na ram mi an dam ve lo ahcun damnak pe khotu Pathian, Zisuh Krih le Thiang Thlarau panh ve cang hna u sih. Damnak le thlarau nunnak kan hmuhtthannak ding caah Zisuh  le Thiang Thlarau cu sawm in bomhhal ve cang hna u sih.

7). Cun Shunam Minu nihcun Elisha Pathian mi ke kha a tlaih, cun a thawh i Bawipa nunbang le na nunbang kan kaltak lai lo. Khat lei chim ahcun Khamhnak, Damnak, le Nunnak na ka pek lo, ka chungkhar na kan pek lo ahcun kan kal tak lai lo, kan tlaipeng ko lai a ti. Cu bia le cu zumhnak nihcun Pathian mi a lungthin cu a suk, a tongh i,  khekkhua dih ai. Cu caah Elisha Pathian mi cu a tho i, Shunam mi nu fa cu damter tthan ding le nunter tthan ding ah amah cu a zulh/kal.  Hngakchia pa hmai cungah a Thiangtthunh cu a chiah, a pum cungah a bawk i a ka zawn ah ka, a mit zawn ah a mit, a kut zawn ah a kut a chiah hna i, tlawmpal ah hngakchia pa cu a dam tthan i a hung nung tthan. Halleluja. A dammi chungkhar, a nuammi chungkhar le a nungmi chungkhar an rak si. 

Cu nih a langhtermi cu: nihin ah taksa, thinlung le thlarau ah na dam lo i, abik in thlarau ah na thih sual ve ahcun damnak pe khotu Zisuh le Thiangthlarau panh ve law, a sin ah thlacam bomh hal ve. Luka. 18:7-8 amah sinah chun zan in bomhhal in a tap a au i thla a cammi cu bomh loin a um hna lo a ti.

Hika zawn ah Thiangtthunh nih a langhtermi Krih Vamlamtahnak a si. Cu Krih Vailamtahnak cu kan thlarau zungzal nunnak le kan luatnak a si i kan taksa le kan thinglung caah damnak an si. (Kolosa. 2:13-15, 3:2-4, Isaiah. 53:5 1Piter. 2:24) Amen.

Thiang Thlarau cu kan nunnak ah hmunhma pe ve u sih law, kan damlonak zawn te kha sawhpiak ve hna u sih. Kan ka zawn ah thlarau ka, kan mit zawn ah thlarau mit, kan kut zawn ah tlarau kut le kan ke zawn ah tlarau ke i tonter ve hna u sih. Cutin kan tuah ahcun taksa, thinlung le thlarau ah damnak tling ka ngei ve lai. Dam duh ah Bawipa a panhmi a lak in an kir bal lo, hawidawt.

III. Naaman Nunak nih a Kan Cawnpiakmi 

1). Naaman, Siria ralbawipa cu thinghmui zawtnak a ngei i kum saupi a dam kho ti lo. Lungrethei le awlokchawng in a um lio ah zei pipa ah a rel lomi a salnu, a sinum nu te nih hi damnak kong thawngttha kha a rak phuan.  Ka bawipa na damlonak hi Isreal ram, Samaria khua i a ummi Profet sin ah va kal law na dam ko lai a ti. Cu bia, cu thawngtha a theih tik ah Naaman dai tein a um lo, damnak a ngeitu sin kalnak lam kha kawl colh. 

Cubantukin vui tampi cu Pathian nih hin thlarau lei kan damnak ding caah hin mi fim, mi thiam, mi rum le Baibal degree sangsang a lami le reng sangsang a ngeimi hna hi a hmang theng ton hna lo i, cu mi hna an sin zong hin thlarau biatak cu a phuangtheng ton lo. Thlarau bia le thlarau hla cu thlarau mi lawng nih an ttheih khawh.. Amen. A caan ahcun nuhmei nu le minung lei zoh ah zei a si lomi zong khi Pathian nih a hman ton ko hna. Bawipa nihcun lenglei sinak hi a zoh ton lo (1Samuel.16:7). Cucaah, uanu damnak a ngeitu Bawi a um i, Pathian mi hman/hmanmi a um, a ra ti-in kan theih ve ko ahcun lunghakter loin amah le a mi cu fuh panh ve ko u sih.

Profet tampi an um, a hmanmi an tlawm te. Nihin kan ram ah Pathian rian ka tuan a timi le a tuanmi tampi kan um ve, asinain Pathian mi hman/hmanmi taktak le thlarau mi taktak hi kan thlawm ve. Micheu khat cu khika hmun ah biatak thawngtha a um i, thlarau damnak a um ti kan theih ko nain, ka Krihfa Buu doctrine ruang le Buu spirit- Buu tanhnak lungthin ka ngeihtuk ruang ah cu damnak cu kan panh duh lo i, cu nak chal cun a si taktak bal lai lo tiah kan sawi hna i a doh tuin kan doh lehlam ton hna. Cu ruangah thlarau lei mithinghmui kan si peng ton. Krihfa ka si ti ve tung i thlarau lei damnak ngeih lo cu ngeihchia a va si hringhran dah! 

2). Naaman cu aa thawh i Pathian mi umnak ahcun a va panh. Profet Elisha nihcun a thawh i Jordan tiva ah khan va kal law, voi sarih in vaa i khawlh/hnim law, na zawtnak vialte cu a thiang/dam lai a ti. Naaman Ralbawipa cu a ruah bantuk si ti lo ai. A lung a dong, cucaah  a timi cu kei ka ruahnak ahcun a ra lai i ka hmazawn ah khan a kut a chuan lai i, Pathian min in a ka dam lai ti pei ka ruah cu, cu lawng  si loin Jordan tiva ngelcel cu a chim hawi rih. Isreal ram ah tiva dang a um ti lo maw a ti? 

Cu nih a kan cawnpiakmi cu Pathian Thiang Thlarau riantuannak hi minung kan i ruah bantuk le minung lei in hitin sisehlaw, kha-tin sisehlaw kan tining in a rak si ton ai lo.  Cu ruangah Tharau riantuannak hi pumpak kan nunnak ah siseh, kan Krihfa Buu nunnak ah siseh, voi tampi cu kan theifiang ton lo i, minung kan duhning le zoh aa dawh kan tining in a si lo caah mi tampi cu thlarau riantuannak hi kan pom kho ton lo. Hruh a si, ningzak a si, zoh a chia kan ti ton. Nang na dir hmun zeitin?

Curuang ahcun pei, mithiang Paul nih mihrut ko kan lo, minung mithmuh ahcun a tinak zong cu a si cu. Thlarau kong cu taksa mi nih an thei kho lo a ti (1Korin. 2:13-14, 1: 18). Asinain van lam a si ko tiah theifiangtu kan ca ahcun lunglawm in kal chin ko hna u sih, cu cu Zisuh he tonnak le kan damnak ding lampi cu an si ko. Amen.

Naaman bantuk in voi tampi cu kei ka ruahnak ahcun kan ti ton ve. Pathian nih a kan duhpiakmi cu kei ka ruahnak ahcun ti siloin Thiang Thlarau nih a ka hruai ning le a ka cawnpiak ning ahcun ti chim tu hi si deuh. (Rom. 8:14) Pathian Thlarau nih a hruaimi hna cu Pathian fa le an si a ti. Amen. .. Kei ka ruahnak le nang na ruahnak, minung kan ruahnak hi thlarau lei kan damnak caah biapi a si lo i, Thiang Thlarau a duhning  in kal le um tu hi kan damnak tling cu a si deuh. 

3). Naaman cu a ruah bantuk a si lo nain, Pathian biatak a si i, cu biatak ahcun damnak a um ti a theih caah, a Inn ah kir tthan loin Pathian mi nih a chimh bang in Jordan tiva ahcun a va kal  i voi sarih aa vaa khawl/hnim. Pathian nih a ka damter lai ti a zumhnak kha a tak in a kal pi i, Bawipa bia bantuk in voi sarih aa hnim tik ah damnak tling a hmu. Amen…

Hi ka zawn ah kan theih ding cu, Naanam a damnak a ruang cu:

 i). Jordan tiva ah damnak a um ruangah a si lo. Cutin sisehlaw cu nihin ah Jordan tiva ah kan vaa i khawl/hnim cio lai i kan dam dih ve ko lai.

ii). Voi sarih tiva ah aa hnim ca zong ah a si lo. Cutin sisehlaw nihin ah voi sarih kan i hnim cio lai i kan dam dih ve ko lai.

iii). Pathian mi Elisha kha laksawng tampi a pek ca zong ah a si lo. Cutin sisehlaw, nihin ah Pastor te le Pathian riantuantu pawl kha laksawng kan pek hna lai i ka dam dih ve lai.

iv). Mifim le mirum le bawi a si ca zong ah  si lo. Cutin sisehlaw, mi sifak kan caah damnak a rak um  ti hnga lo.

Cunak cun Naaman Bawipa a damnak a ruang cu Pathian Bia ning tein a zumh, a kal i, a tuah ca tu ah si deuh. Amen.! 

Pathian BIA le Thiang thlarau riantuan hna kha lung awtom lo tein zum ve, pom ve, co hlang ve, tuah ve law, na damlonak in atu hrimhrim ah na dam ve lai. Naaman kha a zum, a kal i a tuah dih le cangka in damnak tling a ngei. A hnupi ah a dam i a si lo. Pathian khamhnak co caan le damnak hmuh caan cu atu caan, atu ni hrimhrim hi a si ko, hawidawt (2Korin.6:2). 

Biathlangkomhnak 

Hawidawt, atu caan ah thlarau thianghlim nih an hal ve, na dam maw? Na va a dam maw?, na fanu le fapa an dam maw? Na khungkhar an dam maw? Na Krihfa Buu an dam taktak maw?  Na dam lo ahcun atu ah Bawipa sin ah rak panh ve cang.

Nihin ah ngeih chiatuk a simi cu Krihfa kan si kan ti ko ah, a dam ti lomi Krihfa buu le chungkhar kan tamtuk ai. Bawipa thlarau thianghlim nih dam seh law, zungzal nunak ngei seh ti an dupiak dakaw. Jeremiah. 8:22 “ Gilead ah damnak si-ai a um ti lo maw? Khika ah Sibawi pakhat tal an um ti lo maw? Zeicahdah ka mi hna hi an dam hnga lo?”a ti. Thlarau thianghlim nih mitthli he an ngah ko. Zeiruang dah kan dam hnga lo, damnak kan Krihfa buu le kan chungkhar ah a um ti hrim lo maw?

Na dam le damlo a theibiktu cu a pakhatnak ah Pathian a si i, a pahnihnak ah nangmah na si ko. Matthai. 9:12b “ A dammi nih cun Sibawi an herh lo, a zawmi lawng nih Sibawi an herh.  Atu caan ah nangtah damnak Sibawi, Zisuh Krih Thiang Thlarau cu na pan ve lai lo maw?

Kan dam lo ahcun Shunam minu bantuk in Thlarau thianghlim sawm ve hna u sih law, Naanam bantuk in Bawipa bia ning tein zumh, kal le tuah i zuam hram hna u sih. Cutin kan tuah ahcun atu caan hrimhrim ah taksa, thinlung le thlarau ah Pathian nih damnak a kan pek lai i, za lawnnak a kan pek ve lai. Exodus. 15:26 “ Keimah cu an damtertu hna Bawipa nan Pathian cu ka si a ti”.

 

Kan dihlak caah Pathian nih thlua kan chuakpiak hram ko seh! Amen…!!!!!!!